DOLE Siquijor

DOLE SIQUIJOR – COVID-19 Adjustment Measures Program(CAMP)

DOLE SIQUIJOR, DUNAY TANYAG NGA AYUDA SA MGA APEKTADO SA COVID-19

Siquijor, Siquijor – Duha ka mga programa karon ang gitanyag sa Department of Labor and Employment nga mamahimo nga kapahimuslan sa mga nawad-an ug panginabuhi-an gumikan sa epekto sa COVID-19.

Sa pakighinabi sa Radyo Bisdak ngadto ni DOLE Siquijor Field Office Head Nole Torres, nibutyag kini nga gitanyag nila karon ang CAMP kun Covid-19 Adjustment Measures Program ug ang TUPAD – Barangay Ko, Bahay Ko, Disinfection Program.

Ilalom sa CAMP, mamahimo nga makadawat ug ayuda balor P5, 000.00 ang mga apektado nga naa sa mga private sector ilabina ang mga nagtrabaho sa mga establishments nga nanirado gayud. Hinuon, gipahibalo na ni Torres ang pundok sa mga magpapatigayon sa Siquijor kalabot niini. Diin tulo ang kinahanglan nga i-comply alang niini, una ang form nga ipadala ngadto sa DOLE gikan sa mga establishments, ikaduha kinahanglan ang profile sa mga trabahante,ug ikatulo ang company payroll sa nakalabay nga bulan. Human niini, iproseso ug i-verify og dayon i-submit sa regional nga buhatan sa DOLE ang maong mga papel ug dayon, i-process na ang payroll. Diin dili tan-awon ang status sa trabahente kon permanent, probationary o contractual ba.

Matod ni Torres nga kuti ang paghas-has sa lista aron pagsuta nga tinuod madawat sa mga trabahante ang ayuda gikan sa DOLE.

Samtang alang sa informal sector, kun ang mga wala’y employer o agalon, sama sa mga habal-habal drayber, ambulant vendors, ug uban pa, mamahimo sila makadawat ug ayuda pinaagi sa TUPAD. Diin ilalom sa TUPAD – Barangah Ko, Bahay Ko, Disinfection Project, ang mga apektado nga anaa sa informal sector, mao ang tahasan pag-disinfect ilabina sa mga lugar nga kanunay tapokan sa mga tawo.Matod ni Torres nga aduna na sila’y gihimo nga pakig-alayon sa mga Local Government Units sa isla, ilabina sa mga tagdumala sa Public Employment Service Office. Ang PESO na sa matag lungsod ang mupili sa mga madawat ug makatrabaho pinaagi sa maong proyekto.

Matod niini nga aduna na’y initial nga budget alang sa kapin 125 ka mga tawo alang sa informal sector, diin bahin-bahinon pa kini ngadto sa 6 ka mga lungsod sa isla. Panghinaot ni Torres nga madugangan pa ang budget alang sa Siquijor aron makatabang pa ang DOLE sa mga nawad-an ug panginabuhi-an ilabina sa mga informal sectors.

Alang sa mga dugang pangutana, mamahimo makab-ot ang DOLE Siquijor Field Office Head Nole Torres sa numero 0915-414-5662. Ang DOLE Siquijor Field Office bukas gikan Lunes hangtod Huwebes gikan alas 7:00 sa buntag ngadto na sa alas 6:00 sa gabie.

 

DOLE SiquijorDOLE SiquijorSource: Brandon Cuerda Teves

 

No Comments

Post A Comment